ഗർഭഛിദ്രം

ഡിസംബറിന്റെ തണുപ്പുള്ള രാത്രി. 

മലകൾ തടഞ്ഞ് നിർത്തി കറക്കിയടിക്കുന്ന നനുത്ത തണുത്ത കാറ്റ് എന്റെ ജനാലയിലെ കർട്ടനുകളെ വകഞ്ഞു മാറ്റിക്കൊണ്ട് മുറിക്കുള്ളിലേക്ക് കടന്നു വന്നു. മുറിയിൽ കെട്ടികിടന്നിരുന്ന മുഷിഞ്ഞ ചൂട് അന്തരീക്ഷത്തെ, ആ തണുത്ത കാറ്റ് ആവാഹിച്ചെടുത്തു. ജനാലക്കഭിമുഖമായിരുന്നിരുന്ന എന്നെ ആ കാറ്റ് വല്ലാതെ തഴുകി ഉണർത്തി.

മേശവലിപ്പ് തുറന്നു ഞാൻ എനിക്കേറ്റവും ഇഷ്ടപ്പെട്ട പാർക്കർ മഷിപ്പേന എടുത്തു. ഒപ്പം ഞാൻ കുറിച്ച കഥകളുള്ള ഡയറിയും...ഇനിയും കുറെ പേജുകൾ എന്റെ എഴുത്തിന്നായി കാത്തു കിടക്കുന്നുണ്ടായിരുന്നു ആ ഡയറിയിൽ.

ഞാൻ പാർക്കർ തുറന്നു, ഒപ്പം ഡയറിയും. പുതിയ താളെടുത്തു. ഞാൻ കുറിച്ചു,

തീയതി 14 ഡിസംബർ 2018.

കറണ്ട് പോയി....

ഞാൻ മെഴുകുതിരി കത്തിച്ചു, ഫൂ...  ഡിസംബറിലെ കാറ്റ് മെഴുകുതിരി ഊതി അണച്ചു.

എന്നിലെ ഉടലെടുത്ത ആ സാഹിത്യരചനയെ കാറ്റും കറണ്ടും ചേർന്ന്  ഭ്രൂണാവസ്ഥയിൽത്തന്നെ കൊന്നു കളഞ്ഞു. (സെക്ഷൻ 312 IPC 1860) 

-രഞ്ജിത്കുമാർ. എം