മുള്ളിന്നുള്ളം

_____________

ഞാൻ...

മുള്ളാണ്, മുനയുള്ള മുള്ളാണ്:

കൊരുത്തുകീറുന്ന കൂർത്തമുള്ള്.

മണമുള്ള, നിറമുള്ള പൂക്കൾക്കും 

തേനൂറുംമധുരക്കനികൾക്കും 

രാപകല്‍ കാവലാളിന്നു ഞാൻ.

കർമ്മമാണ്; ജീവിതധർമ്മമാണെങ്കിലും

നിങ്ങളിൽക്കൊള്ളുകിൽ നോവുന്നതെന്നുള്ളം

മുള്ളിനാവതില്ലാരെയും നോവിക്കാൻ

മുള്ളറിയാതെവരും നോവാണ്; മുറിവാണ്.

'മുള്ളിനെ മുള്ളാലെടുക്കണ'മീ ചൊല്ല്

മുള്ളോളം മുള്ള്മാത്രമെന്നുരയ്ക്കുന്നു. 

നന്മകൾ നിറയുമാ സാരോപദേശങ്ങൾ 

മുള്ളുവാക്കായിക്കാണുമിളംതലമുറ.

മുള്ളിന്നിടനെഞ്ചിൻനോവറിഞ്ഞീടാൻ

പോരുക മറ്റൊരു മുള്ളായ്  നിങ്ങളും.

വരുക, നമുക്കൊന്നായ് ചേർന്നിരിക്കാം 

മുള്ളിനാലുള്ളൊരീ ശയ്യതന്നിലായ്.

മുള്ളുപോലുള്ളൊരാമപ്രിയസത്യങ്ങ-

ളോതി,ത്തീർത്തതോ ഞാനൊരു മുൾവേലി!

മുള്ളിന്‍റെ ധർമ്മം സംരക്ഷണമെന്നതറിയുക

മുൾക്കിരീടം ഞാനൊന്നാഴിച്ചുവെച്ചിടട്ടെ.

അഭിശപ്തമാമൊരുജന്മം ഞാനെങ്കിലും

മുനവെച്ച വാക്കിലി,ന്നമ്പേ തളരുന്നു.

വെറുപ്പാണ്, ആട്ടിയകറ്റാറാണെങ്കിലും

മുള്ളല്ലേ, കൊള്ളാതിരിക്കുവാനാകുമോ?

***************************************

ശ്രീരാമൻ വൈക്കം.